Koh Santepheap Daily
ដើម ពោធិ៍ធំ ៗ អាយុកាល រាប់ រយ ឆ្នាំ ត្រូវ ឈ្មួញ សម្រុកនាំចេញ ទៅ វៀតណាម ( រូបថត ចាន់ថេត )
តាមលោកវរសេនីយ៍ឯក ជឹម សេងហុង ស្នងការរងនគរបាលខេត្តទទួលផែនកណ្តាលយុត្តិធម៌មានប្រសាសន៍ថា លោកឧត្តមសេនីយ៍ត្រី នួន សាមិន ស្នងការនគរបាលខេត្ត បានចាត់ឱ្យកម្លាំងអន្តរាគមន៍របស់ការិយាល័យកណ្តាលយុត្តិធម៌ខេត្តចេញ ល្បាតនៅតាមដងផ្លូវសំខាន់ៗនានានៅតំបន់ត្រើយខាងលិចនិងត្រើយខាងកើតទន្លេ មេគង្គដើម្បីរក្សាការពារសន្តិសុខនិងសណ្តាប់ធ្នាប់ជូនប្រជាពលរដ្ឋតាមបទ បញ្ជារបស់អគ្គស្នងការនគរបាលជាតិ ។ នាវេលារំលងអធ្រាត្រនោះពេលដែលកម្លាំងក្រោមឱវាទល្បាតទៅដល់ឃុំជី រោទី២ ស្រុកត្បូងឃ្មុំ ក៏ប្រទះឃើញរថយន្ត១គ្រឿងដឹកដើមពោធិ៍១ដើមធំ មានអាយុកាលរាប់រយឆ្នាំចេញពីត្រើយខាងលិចឆ្ពោះទៅត្រើយខាងកើត ទំនងនាំទៅលក់នៅប្រទេសវៀតណាម។ ពេលឃើញបែបនេះ ក៏បានចាប់ឃាត់មិនអនុញ្ញាតឱ្យបន្តដំណើរទៅមុខទៀតទេ គឺឱ្យបើកត្រឡប់មកក្រោយយកមករក្សាទុកនៅស្នងការដ្ឋាននគរបាលខេត្ត ។
វត្ថុ តាង ដែល រឹបអូសបានត្រូវតែកសាងសំណុំរឿង បញ្ជូន ទៅ សាលាដំបូងខេត្តចាត់ការ ( រូបថត ចាន់ថេត )
តាមអ្នកបើកបររថយន្តឈ្មោះ ឈូក សុខា ភេទប្រុស អាយុ៣៨ឆ្នាំ រស់នៅភូមិកណ្តោលកោង ឃុំកោងកាង ស្រុកពញាក្រែក រៀបរាប់ប្រាប់ថា គាត់ត្រូវបានក្រុមហ៊ុនប៉ូប៉ូដែលមានទីតាំងនៅស្រុកពញាក្រែក ជួលរថយន្តគាត់ឱ្យទៅដឹកដើមពោធិ៍១ដើមធំនៅស្រុកឧដុង្គ ខេត្តកំពង់ស្ពឺ នាល្ងាចថ្ងៃទី៧ មេសា ដើម្បីយកទៅដាក់នៅស្រុកពញាក្រែក ។ លុះដឹកមកដល់ជិតបន្ទាយទាហានថ្នល់ទទឹង ស្រុកត្បូងឃ្មុំ ក៏ត្រូវកម្លាំងនគរបាលចាប់ឃាត់រួចបញ្ជូនមកកាន់ស្នងការដ្ឋាន នគរបាលខេត្តទាំងយប់ ។ ចំណែកអ្នកចាត់ចែងរបស់ក្រុមហ៊ុនប៉ូប៉ូម្នាក់បានប្រាប់កោះសន្តិភាព តាមទូរស័ព្ទថា ដើមពោធិ៍១ដើមខាងលើនេះមិនមែនជារបស់ក្រុមហ៊ុនប៉ូប៉ូឡើយ គឺឈ្មួញទេដែលជាអ្នកដឹកយកមកលក់ឱ្យក្រុមហ៊ុននោះ នៅស្រុកពញាក្រែក សម្រាប់យកមកផ្សាំនិងលក់ ឱ្យប្រជាពលរដ្ឋឬតាមសណ្ឋាគារណាមួយសម្រាប់ដាំលម្អឱ្យមានសោភ័ណភាព។ កន្លងមក ក្រុមហ៊ុនប៉ូប៉ូ មិនដែលនាំដើមឈើធំៗ ចេញទៅប្រទេសវៀតណាមឡើយ ។ លោកវរសេនីយ៍ឯក ជឹម សេងហុង បានបញ្ជាក់បន្ថែមថា ការចាប់ឃាត់រថយន្ត ដឹកដើមពោធិ៍នេះគឺយោងទៅតាមលិខិតណែនាំរបស់លោកហ៊ុន ណេង អភិបាលខេត្តហើយវត្ថុតាងដែលរឹបអូសបានត្រូវតែកសាងសំណុំរឿងបញ្ជូនទៅ សាលាដំបូងខេត្តចាត់ការតាមច្បាប់ ៕
No comments:
Post a Comment